HUELLAS DE NUESTROS ANTEPASADOS

​

Hayeen ipaii quih taax comcaac coi ziix quih oaanloj mos àno hantx moca coi zo haa ha. Hantx mocat iyat cöhayacp coi hayeen ipaii pti immis quih anxö ooxt iha, ziix quih oaanloj xah, iti cöipactoj quih iicp mota ma x, ooxt iha.

 

Ox oo mpacta xo, xiica quih oo cöquii coi taax iij imapactoj ha, taax cheel xah, cooxp xah, icahooil yaail cöcooil xah taax ah oo cöimii hayeen ipaii quih caziim quih cöisaaizi hac.

​

Hayeen ipaii coi iiqui he ihiin hac taax hanso ziix hayeen hac ihanaxz z imhaa ha, taax ziix quih hamoz ihaait quih thaa, iyat cöhayacp com ziix quih hiicot yatoohjoj quih sahnzaait ca xah coi thaa, hayeen ipaii coi taax hihiistox com oo iiqui cöquiih iha. 

​

Ziix iti cötapacta ma, ziix hipquih cöhihaaizi hac taax, hayeen ipaii iyat cöhayacp quih ooxt, hiicot yatoohjoj coi iicp cöiscmatoonlac hac oo cötpacta ma, hayaaizi ha.

 ​

​​

JESSICA LÓPEZ